Historiku
Teatri i Poezisë në Prishtinë është një institucion kulturor i themeluar nga poeti Lulzim Tafa, me qëllim krijimin e një hapësire të përhershme kushtuar poezisë, interpretimit dhe performancës poetike. I hapur në vitin 2025, në kuadër të Shtëpisë së Poezisë në Prishtinë, ai përfaqëson një koncept unik në Kosovë dhe jashtëzakonisht të rrallë në nivel ndërkombëtar.
Që nga themelimi, Teatri ka mirëpritur poetë të njohur nga Kosova, Shqipëria dhe vende të ndryshme të Ballkanit, por edhe nga shumë vende të botës, përfshirë Shtetet e Bashkuara, Francën, Greqinë, Kinën, Rumaninë, Hungarinë, Meksikën dhe vende të tjera. Përmes leximeve, performancave dhe takimeve ndërkombëtare, Teatri i Poezisë është shndërruar në një hapësirë të rëndësishme të dialogut kulturor, duke lidhur poetë dhe kultura të ndryshme dhe duke promovuar Prishtinën si një qendër të poezisë bashkëkohore.
Teatri i Poezisë e shndërron Prishtinën në kryeqytetin botëror të poezisë
Teatri i Poezisë në Prishtinë mbrëmë u shndërrua në një skenë ndërkombëtare të artit dhe dialogut kulturor, duke mirëpritur 74 poetë nga 40 vende të botës, në kuadër të Kongresit të 45-të Botëror të Poetëve, që po mbahet në Kosovë nga 25 deri më 30 shtator 2026.
Për disa orë, skena e Teatrit të Poezisë bashkoi poetë, gjuhë, kultura dhe përvoja të ndryshme krijuese. Në Prishtinë u prezantuan poetë nga Shtetet e Bashkuara të Amerikës, Franca, Zelanda e Re, Greqia, Kina, Rumania, Hungaria, Meksika dhe vende të tjera, duke e kthyer kryeqytetin e Kosovës në një pikë takimi për krijues nga vende të ndryshme të botës.
Pjesëmarrësit lexuan krijimet e tyre para publikut, duke sjellë në skenë zëra dhe perspektiva të ndryshme poetike dhe duke dëshmuar rolin e poezisë si formë komunikimi përtej kufijve gjuhësorë, kulturorë dhe gjeografikë.
Kongresi i 45-të Botëror i Poetëve zhvillohet këtë vit nën frymën e kulturës, artit, shkencës dhe dijes në shërbim të paqes. Përmes leximeve poetike, takimeve dhe shkëmbimeve kulturore, aktiviteti synon të krijojë ura të reja bashkëpunimi mes poetëve dhe krijuesve nga vende të ndryshme.
Mbrëmja në Teatrin e Poezisë e vendosi Prishtinën në qendër të një takimi ndërkombëtar të poetëve, ku 74 zëra nga 40 vende u bashkuan në një skenë të vetme përmes artit të fjalës. Ngjarja përbën një prej momenteve të rëndësishme të programit të Kongresit dhe një tjetër dëshmi të rolit që arti dhe letërsia mund të luajnë në dialogun mes kulturave./KultPlus.com
