TË DIELAVE MOS MË THIRR MË
Të dielave mos më thirr më
Mund të mos zgjohem
Përjetë të rri në gjumin e vdekjes
Mos i harro çastet e ngrira
Veç të dielës zgjidhe ditën tënde
Për ty kur të vdes
Pas shtatë bjeshkësh të ta gjej emrin
Ah, si nuk vjen ditëve të tjera.
ANDËRR
(Palimpsest kozmik)
Mos u dëshpëro e dashur
As mos u zhgënje
Sapo mora vesh
Unë fare nuk ekzistoj
As ti
E tëra është një ëndërr
Askush nuk ekziston
Më e keqja
As bota
Asgjë që mendojmë se është
Nuk është
Nuk ekzistojnë malet, detet, oqeanet
As qiejt
Nuk ekzistojnë planetët
Dielli, Toka e Hana
Hana hiç se hiç
(Logjikë) diçka kaq e bukur
S’mund të ekzistojë
Ashtu siç nuk ekzistojnë
vitet e dritës
Kashta e Kumtrit
Atmosfera, hidrosfera
Biosferë nuk ka
As që ka pasur
As që do ketë
Harroje
PIKË.
Astronautët kanë gënjyer edhe pse
As ata nuk ekzistojnë
Mos beso më në galaktika
Big bangu andërr ka qenë
Si andrrat ma
Të trishta
Të bukura
Plot zjarr
Lindja e vdekja
Ferri e Parajsa
Andrra janë
Mos u dëshpëro
As rruga tjetër e Qumështit
As gjithësia
Më vjen keq e dashur
Nuk ekziston
As dashuria
Edhe pse të dua
As Prindërit tanë kurrë nuk kanë ekzistuar
(ku janë pra)?
Veç për Zotin e di
Ai është diku
Mbase është i vetmi që mohohet
Mbase është ai
“Që po na sheh në andërr”.
Se Zoti
Është një fëmijë i vogël
Që luan me yje
AKULL DHE DASHNI
Për Zotin Për ty
Për kry t‘vargut
Nuk e di
Kam rrëshqitë
N’dashni si në akull
Apo kam rrëshqitë
Në akull
Si n’dashni
TY
Kryq para Djallit
T’kam vnue
Me m’dashtë
Me m’mbrojtë
Me shpirt
Me trup
Me m’mlue
EH
Dreqi ti
Si se kap dashurinë
Që ta hodha në ajër
S’e di ti
Sa lehtë e ke
Me m ‘përpi
Me një frymëmarrje
PËRSËRI
Dreqi ti
Dashuria ka metastazu në ajër
Veç vonim
Se p‘shtim nuk ki
Dije
PIROMANE
Më ke ndezë
si zjarr
dhe po ngrohesh me mua
mbaje mend
vetë ke me u djeg
me sytë
me buzët
tua
FOBI
Kam frikë
Mos verbohem
E më nuk të shoh
Me sy
Ruaji sytë tu
Ruaji sytë e mi
ASHENSORI
Sapo dyert e ashensorit u mbyllën
Ajo e nxori ID e vet zyrtare
Dhe buzët e trasha
Drejt meje i zgjati.
Unë jam Maria Skorelesku
Dhe kam të drejtë
Të të puth
Pa të pyetur.
U stepa nga formalizmi
I saj
I tepruar.
Më fal i thashë të lutem
Se jam një anarkist
I njohur për puthje.
Si gjuhë gjarpri
Gjuhë e saj
Çau buzët e mia
Pushtim total
oral.
Në tabelën informuese të ashensorit
Numrat e kateve ndërroheshin.
Pesë
Gjashtë
Shtatë
Në të tetin
isha zënë rob
Kjo tanimë ishte e qartë.
Me kot mundohesha
T’i liroja duart
Nga gjoksi i saj.
Në katin e katërmbëdhjetë
Ashensori ndaloi
Për të fundit herë
Për fat
Për pak
Përpara se
të pëlciste gypi
Me ujë të valë.
VASHA E DUKAGJINIT
Ti nuk i përngjan mëngjesit
As jorgovanit syçelë.
E kthjellët je
Më e kthjellët se loti
Se ujë i Drinit
të bardhë
Se ujë i Drinit
të zi
Se vesa
Se pika e shiut.
E shenjtë je
Më e shenjtë
se ura e shenjtë
Se Rozafa
Se motra e Gjergj Elez Alisë
E bukur je
Më e bukur
se vasha e përrallave
Kristal je
Kristal ke syrin
Filigranët të qesin nëpër unaza
Djemtë e ri
Përpara pasqyrës
e vrasin veten
Asgjë s’të përngjan
më shumë se lulëkuqja
vashë e dukagjinit
ruaju hënës përgjysmë
dhe shamizezave
shëngjergjave kur ta lidhin
gërshetin.
QERSHIZË
Ti më shumë
se secila
pemë në kopshte
ke qershi
në sy
në buzë
në gji.
SMS
Tung zemër
Diellin e kam afër
Vetëm një metër
Ti, pika e ujit
Që ferrin e shkymë
KATI I TETË
Hotel Marriott ka një SPA në katin e tetë
Aty e dashura evropiane e Miliarderit Saudit
Në një saunë më shfaqet hot.
Derisa Magnati Miliarder e kishte kohen e gjumit
si fëmija
si fëmija flejne magnatet nga lodhja
Duhet kuptuar i kishte shtatëdhjetë
E modelja nga Evropa
Ende njëzet e gjashtë këtë vjeshtë.
Ajo ishte pothuajse nudo
E unë
Si pis që jam,
E i tillë kam qene gjithmonë dorën në zemër
Për sqarim në zhargon
Pis quhet lexuesi i syve të një femre
Në sytë e sajë unë pashë etje pashë zjarr
Jo formalisht unë kam bërë
edhe një kurs për zjarrfikës
Qysh kur isha shtatëmbëdhjetë
Atëherë kur në fshatra fikeshin dritat
Dhe u ndizej zjarri grave
Të burrave që punonin në turninë e tretë
Ishte kohë skamje ateherë
Jo si tash në Marriott
në SPA në katin e tetë
DEHJE ME FATALITET
Ti ke dehje fatale
kur dehesh
Vret,
Unë vetëm
Kur dehem
Të dashuroj
Fatalisht dehemi
Të dy
KE FJETUR NËN HËNË
A s’të dhimbsem
Dielli t’i vrau sytë athua
Ke fjetur nën hijen e hënës
Dhe pa dashur të futa në këngë
Pse qan?
Sytë s’dhimbsen a
Do të vij në ëndrrën tënde
Dhe do ta harroj udhën e kthimit
Nga vaji i lig
Nga ëndrra e zezë
Të lutem mos qaj
A s’të dhimbsem unë vogëlushe
AJKUNA
Nën dritën e hënës e zë Ajkunën
Tu’ i nxjerr grigjës tamblin
Ajkunë
Ç’bën ti me grigjën
Do të bëj unë me ty
Uh qyqja unë për kopenë tha
Tu’ kujtu’ se i kish rënë
Ujku n’qafë.
EROTIKË E LEHTË
Mban mend oj
Kur ishim
Një
E të zhvishja
me sy
Ti askund
E unë
Mbi
Ty.
Dikur vonë
Na përziheshin
Gishtërinj dhe maja.
MOSMARRËVESHJE
Mollën i thashë
ma jep
Ajo m’i dha
mollët
Si qershi
u skuq,
E unë
u gjenda
në majë të saj
Në trung qershie.
TELEFONI
Cingëron fort trishtueshëm
Në mesëndërr
Në mesnatë
Telefoni i kaltër
Përmes telave i mban
Lidhjet e zemrave
TË DUA MË SHUMË SE PAULINËN
Mos u shqetëso e dashur
Ajo me Paulinën ishte flirt
Si me Hanën
S’e di as vetë
si u zura pranë saj
Ti e di
Unë s’u rezistoj bruneve
Me sy deti
Nuk ishte dashuri
E di
Që ty të intereson
dashuria
Flirt ishte
Akt rrugaçësh
S’e di as vetë
Si u zura pranë saj
S’e di as vetë
Si më zure ti
Ti e di
Unë s’u rezistoj bruneve
Me sy deti
Ata më thanë ik dhe unë
ika
Kokën time të prerë
Në dorë ma dhanë
Dhe thanë
Ik!
Zorrët m’i nxorën
Dhe me to
M’i lidhën këmbët
Dhe thanë
Ik!
Mbusha xhepat
Me gjak
valigjet me gjymtyrët
e mia dhe
IKA.
He was born on 2nd February 1970 in Lipjan near Prishtina, the capital city of the Republic of Kosova. He completed his primary and secondary education in his birthplace, in Lipjan…
Read More
© 2024 LULZIM TAFA – Administered by Ardian Sallauka
